அமெரிக்காவின் லாஸ் ஏஞ்சல்ஸில் உள்ள டால்பி அரங்கில், 97-வது ஆஸ்கர் விருது விழா, இந்திய நேரப்படி நேற்று காலை கோலாகலமாக நடைபெற்றது. சர்வதேச அளவில் திரைத்துறையின் உயர்ந்த விருது விழாவான இதில் உலகில் பல்வேறு நாடுகளிலிருந்து திரையுலகினர் இதில் பங்கேற்றனர்.
விழாவை, பிரபல நகைச்சுவை நடிகர் கோனன் ஓ பிரைன் தொகுத்து வழங்கினார். இதில், ‘எமிலியா பரேஸ்’ என்ற பிரெஞ்சு மொழி படம், அதிகபட்சமாக 13 பிரிவுகளுக்கு பரிந்துரைக்கப்பட்ட ஆங்கிலம் அல்லாத பிற மொழி படம் என்ற சாதனையை படைத்தது. இதில், பாலியல் தொழிலாளியின் காதலைப் பேசிய ‘அனோரா’ படம், 5 விருதுகளை வென்றது.
சிறந்த படம் (சீன் பேக்கர்), சிறந்த இயக்குநர் (சீன் பேக்கர்), சிறந்த ஒரிஜினல் திரைக்கதை (சீன் பேக்கர்), சிறந்த நடிகை (மைக்கி மேடிசன்), சிறந்த படத்தொகுப்பு (சீன் பேக்கர்) ஆகிய பிரிவுகளில் ‘அனோரா’ விருதுகளை வென்றது. ஒரே படத்துக்காக, 4 ஆஸ்கர் விருதுகளை ஒருவரே (சீன் பேக்கர்) வெல்வது இதுதான் முதல் முறை.
‘த புரூட்டலிஸ்ட்’ திரைப்படத்துக்கு 3 விருதுகள் கிடைத்தன. சிறந்த நடிகர் (அட்ரியன் ப்ரோடி), சிறந்த ஒரிஜினல் இசை (டேனியல் ப்ளூம்பெர்க்), சிறந்த ஒளிப்பதிவு (லால் கிராலே) ஆகிய பிரிவுகளில் இந்தப் படம் விருதுகளை வென்றது.
மற்ற விருது விவரம்
துணை நடிகர்: கீயரன் கல்கின் (எ ரியல் பெய்ன்)
துணை நடிகை: ஜோ சால்டானா (எமிலியா பரேஸ்)
தழுவல் திரைக்கதை: கான்க்ளேவ்
விஷுவல் எபெக்ட்ஸ்: டூன்: பார்ட் 2
சிறந்த ஒலி அமைப்பு: டூன்: பார்ட் 2
வெளிநாட்டுத் திரைப்படம்: ஐம் ஸ்டில் ஹியர் (பிரேசில்)
ஆவணப்படம்: நோ அதர் லேண்ட்
ஆவணக் குறும்படம்: தி ஒன்லி கேர்ள் இன் த ஆர்கேஸ்ட்ரா
அனிமேஷன் படம்: ஃப்ளோ
ஆடை வடிவமைப்பு: பால் டாஸ்வெல் (விக்கட்)
ஒப்பனை, சிகையலங்காரம்: தி சப்ஸ்டேன்ஸ்
பிரியங்கா சோப்ரா மற்றும் குனீத் மோங்கா தயாரிப்பில் டெல்லியில் எடுக்கப்பட்ட ‘அனுஜா’ என்ற குறும்படத்துக்கு விருது கிடைக்கவில்லை.